انا شريف حمدى او زياد الغلس ازيكم عاملين اية (يارب متكنوش عملين كوسة لحسن مبحبهاش خالص) انا من مواليد برج الاسد (6/8) و طبعا لليعرفوا فى الابراج برج الاسد دا مليان نشاط و حماس و شوية كسل على شوية منظرة لكن خلينا فى النشاط و الحماس هما دول اكتر حاجتين ساعدونى فى شغلى سواء فى التمثيل او فى الفنادق , انا اصلا خريج كلية السياحة و الفنادق قسم ادارة فنادق و اشتغلت فى تخصصى كذا سنة فى ادارة المبيعات مش فى المطبخ تعبت اوى لكن اتعلمت اوى اوى ,اتعلمت حاجات كتير عن طباع و صفات الناس و طريقة التعامل معاهم بدبلوماسية و لباقة و شوية حزم (يعنى من غير ما امد ايدى على حد) و دا ساعدنى كتير فى مجال التمثيل اللى عشقته من اكثر من 14 سنة و صممت ابقى واحد من ناسه بالاجتهاد الشديد , ابتديت بالتمثيل على مسرح الجامعة كرئيس لفريق التمثيل فى كليتى لمدة 4 سنين و لما اتخرجت اشتغلت فى التمثيل (مع الفنادق) فى اعلانات تلفزيونية حوالى 15 اعلان و فى الراديو فى اذاعة الاف ام فى المسلسل الكوميدى "الجريمة الضاحكة" باللغة الانجليزية و فى ادوار صغيرة فى افلام سينمائية زى "صعيدى فى الجامعة الامريكية" و "لية خلتنى احبك" لكن كان اشهرها "فيلم ثقافى" و "جائنا البيان التالى" و حاليا بصور فيلم "احلى الاوقات" يارب لما تشوفوه تقضوا معاه احلى الاوقات . فى مجال الفيديو كنت محظوظ لانى شاركت مع شباب دمه خفيف اوى فى برامج كوميدية كانت جديدة من نوعها اول ما طلعت زى "دربكة" و "نشاز" و "هادى و فادى" و "باتجونيا" و "احلى نكتة" و "كذاب" , و اخيرا فى رمضان السنة دى (2003) شفتونى فى دور تامر البياص المحامى و عضو حزب صيحة الامة المعارض فى مسلسل "العمة نور" الدور اللى اتمنى انه يكون عجبكم لانى حبته اوى . طول مشوارى دة كنت مؤمن بقاعدة اخترعتها لنفسى و هى " ابذل كل جهدك و تركيزك فى كل و اى مشهد تعمله و كانه اول و اخر مشهد الناس هتشوفك فيه" و الحمد لله انه وفقنى فى كل الخطوات دى لانها اهلتنى انى اكون واحد من ابطال احلى و اجمل مسلسل عملته و هو "شباب اون لاين "باجزائه الثلاثة و يكفى انى اقولكم انى بسبب حبى الشديد للعمل دة استقلت من شغلى فى الفنادق عشان اتفرغله تمام على الرغم من انى مجوز و عندى مسئوليات مادية كثيرة اوى (بالعربى يعنى انا دلوقتى بشحت فلو حد يحب يتبرع يبقى له كل الاجر و الثواب) ,فى الاول كنت خايف من دور زياد الغلس لحسن غلاسة التمثيل تقلب و تبقى جد مع الناس لكن الحمد لله بفضل تشجيعكم لى و حبكم للدور قدرت انى اتعامل معاه بشكل كوميدى خفيف و جديد و اتمنى انى افضل عند حسن ظنكم عشان كدا نفسى دايما تبعتولى برايكم فى ادوارى و شغلى و اقتراحتكم عشان اتطور للأحسن و الايميل بتاعى هو  اخيرا مش عايز اطول عليكم (كل الكلام دة و مطولتش) لكن بجد انا بحبكم جدا و هدفى من شغلتى دى انى اسعدكم زى ما انتم بتسعدونى بحبكم . شريف حمدى