أنا بشرى او ممكن تسموني ليليان كريكور و هو اسمي في مسلسل شباب أون لاين وفيه ناس بيسموني داليا فشوش لكن اقرب حاجة لقلبي هي ليليان علشان دي أول شخصية مثلتها في حياتي ومن خلالها اتعلمت التمثيل. أنا في آخر سنة في الجامعة وبادرس ارشاد سياحي في كلية سياحة وفنادق جامعة حلوان- القاهرة يعني هيروغليفي وحاجات مكلكعة كدة من اللي ماتتفهمش بس دمها خفيف على قدنا بس نفسي اخلص وآخذ البكالوريوس علشان اركز في الفن. عايز اقولكم اني بحب الاكل جدا ولو انه مش باين عليا بس والله باكل كتير جدا. الموسيقي والغناء حياتي. باكون مبسوطة جدا وانا باغني أو لما اسمع حد بيغني. بحب البرد قوي، يمكن لاني مولودة في انجلترا وهي بلد الثلج، لكن باحب مصر قوي وأهلها لأانهم أخف دم في الدنيا. درست البالية 11 سنة لكن هدفي في الآخر هو تقديم فن شامل. وقت فراغي يااما نايمة او باتفرج على التلفزيون او باسمع اغاني وممكن أديها رقص قدام المرايا وساعات باقرأ. بيقولوا على شقية وعندهم حق. أنا فعلا شقية قوي بس ساعة الجد بكون جد الجد او ميت جد و14 بس أهم حاجة يفضل الواحد يضحك حتى في الحزن عشان الحياة تستمر. المهم في الاخر اتمني اني اكون عند حسن ظن الجمهور دائما وتحبونا زي ما احنا بنحبكم وبنحاول نبصطكم